Glatte vegar i Os: Fare for innstilte bussruter

Skyss melder om forsinkingar og moglege innstillingar på fleire ruter.

Skyss opplyser fyrste juledag om glatte vegar og vanskelege køyreforhold fleire stader. Os skal vera ein av stadane det er verst.

Mellom anna er det forsinkingar og fare for innstilte avgangar på rute 600 mellom Os og Bergen. Det same gjeld 603 og 610.

BT skriv at fleire bussjåførar har ringt inn og fortalt om klink is i mellom anna Os-området.

Bussjåfør Ørjan Aasheim fortel at han har stått i ein og ein halv time på Osvegen ved krysset til Hamrevegen med buss 610.

— Eg kunne ha stått på skøyter utanfor, seier han til BT.

Også på Fusa-sida er det vanskelege køyreforhold. Taxisjåfør og styreleiar i Fusa Taxi, Siljan Bolstad, melder om glatte vegar på heile strekket mellom Eikelandsosen og Strandvik.

Ille over Valle

Trafikkoperatør på Vegtrafikksentralen, Arne Viken, seier at det enkelt og greitt er glatt i heile Bergens-området.

— Spesielt på gamle E39 over Vallaheiane. Derfrå har vi fått fleire meldingar om at det er skikkeleg glatt.

Elles strøymre det inn meldingar frå Øygarden, Askøy og sentralt i Bergen.

— Ein del entreprenørar har rett og slett vore litt bakpå ein del stader. Då går det dessverre litt tid før forholda blir betre.