Showkonsert i Oseana

Aksel Kolstad har spelt på fleire av dei største, norske klassiske kammermusikkfestivalane og gjestar med jamne mellomrom dei største konsertscenane i Noreg. Laurdag 28. november vert han å oppleva i Oseana.

Den unge, norske pianisten, komponisten og entertaineren er hylla både i Russland og Estland som eit geni, og Göteborgsposten har kalla han vår tids Franz Liszt. Musikken kombinerer han med humor og stand up, og framsyningane tek meir form av show enn reine konsertar.

Kolstad debuterte som klassisk pianist og komponist i Carnegie Hall i New York i 2010 med fullt hus og ståande applaus etter 6 års studie ved Norges musikkhøgskole under professor Sigurd Slåttebrekk. Han har spelt konsertar over heile verda, i hovudsak i Russland, USA, Estland og Asia. Han har opptredd på både fransk, tysk, tyrkisk og austerriksk tv.