Nabolaget held leikeplassen fin. Utan varsel har kommunen tatt seg til rette

Er det slik kommunen ønskjer å opptre?

I iveren etter å fortetta Os sentrum, er vi heldige som framleis har nokre leikeplassar til allmenn bruk. Ein av desse ligg i Kolabakkane. Denne leikeplassen ligg på kommunal grunn, men kommunen har fråskrive seg ansvaret for vedlikehaldet. Alt vedlikehald og opprusting fell på dei som bur nærast.

Seinast i sommar bad vi om litt støtte frå kommunen, men fekk etter lang tid melding om at dette måtte nabolaget gjera på dugnad. Og dugnad har vi hatt! I mange år. Vår, sommar og haust vert grasbanen og området rundt slått ein gong i veka, det vert gjødsla og stelt. Grusområdet og beda vert luka, benkar og reiskapsbua reparert og måla, og planter har vi sett ned.

Dette til glede for alle innbyggarane i kommunen, på kommunal grunn. Leikeplassen er ein trygg og god stad for born å vera. Det er ikkje mange slike stadar igjen i sentrum.

For fire år sidan vart heile leikeplassen brukt til arbeidsplass då det skulle leggjast røyr i nabolaget. På måndag kom gravemaskinene att, dei gjerda inn og grov opp heile området som nyleg er stelt i stand. Dette utan varsel til oss som har ansvaret for området og har gjort jobben i ei årrekke - sidan 70-talet. Er det slik kommunen ønskjer å opptre?

Truda Lunde