Oppfylling av lokale MOT-draumar

Kvart år får alle 9.klassingar som har MOT, søke om å få draumen sin oppfylt. I år er det seks draumar vi har fått vere med å oppfylle.

Kvart år får alle 9. klassingar som har MOT, søke om å få draumen sin oppfylt. Vi sender søknadane inn sentralt, men i tillegg har vi i fleire år fått lov til å oppfylle draumar lokalt i Os. Vi har to ungdomsskular her, og vi brukar å oppfylle draumane til eitt par av ungdommane våre på kvar skule.

Det er viktig å ha draumar, å setje seg mål. I draumane ligg fantasien, og nokre gonger kan fantasien bli verkeleg. Dette er noko vi ønskjer å formidle til ungdommane våre, og vi ønskjer å vise dei at draumar verkeleg kan gå i oppfylling. Nokre gonger kan sjølve draumen bli verkeleg med hjelp frå oss, og nokre gonger er det kanskje eit steg på vegen mot målet og draumen vi kan hjelpe til med.

Det er mange flotte draumar vi får søknader om å oppfylle. Når vi skal plukke ut draumar vi arbeider vidare med, prøver vi å variere litt frå år til år, og i innhald. Vi ser på kven som ønskjer noko for seg sjølv, og kven som drøymer om noko for nokon andre, og vi ser på kva vi praktisk kan få til. Her møter vi enorm positivitet og vilje til å få til noko, både hos lokalt næringsliv, privatpersonar, lag og organisasjonar, artistar, skodespelarar, og mange fleire. Vi ønskjer å takke alle som stiller opp, som ser verdien av å ta imot desse ungdommane, og som tek draumane deira på alvor.

Når vi skal opplyse om kven som får draumane sine oppfylte, samlar vi heile trinnet på kvar skule, og får med oss vår lokale MOT-ambassadør Eirik Søfteland. Han spelar eitt par låtar for ungdommane, og snakkar om kvifor han syns det er viktig med draumar. Vi set stor pris på at Eirik er med oss, og bidreg på sin måte inn i arbeidet vårt!

I år er det seks draumar vi har fått vere med å oppfylle:

I både klasse 9E (no 10E) ved Nore Neset ungdomsskule og i klasse 9D (no 10D) ved Os ungdomsskule, ønskte fleire elevar at dei skulle gjere noko kjekt saman med klassen sin, for å styrke klassemiljøet. Her fekk vi god hjelp og flott service frå Bjørnefjorden Paintball, ved Mons Daniel Haugland. Nore Neset-gjengen har vore og leika seg i skogen i haust, Os-ungdommane skal gjere det til våren. Ei fin avslutning på 10.klasse!

Ein elev ved NNU ønska ein draumedag for mor si, og fekk gåvekort på ein SPA-dag for henne.

To jenter, Pernille frå Nore Neset ungdomsskule og Kine frå Os ungdomsskule, drøymer om å bli skodespelarar, og ved fantastisk hjelp frå dramaturg Morten Kjerstad ved DNS, fekk dei ein dag på teateret. Her fekk dei full omvisning i «alle krinkar og krokar» av huset, og som jentene sjølv kommenterte, så vart dei møtt så positivt av alle dei helste på.

Skodespelarar, ansatte i produksjon (t.d kostyme, rekvisitt og snekkeri), i teknisk avdeling, og i leiing, tok seg tid til å prate, fortelje og svare på spørsmål. I tillegg fekk dei vere publikum på dei aller første sceneprøvane av Peter Pan som går på DNS nett no.

Den siste draumen denne gong var det Muriel frå Os ungdomsskule som fekk. Ho drøymer om å lære seg å joike! Ho er stolt av tilknytninga til sameslekta si, og ønskjer å overraske familien sin med joik. Sist fredag fekk ho delta på joikekurs i Bergen, i regi av Bergen Sameforening, og i etterkant av kurset fekk ho samtale og gode råd frå kurshaldaren – sjølvaste Mikkel Gaup.

I tillegg til å lære nokre joikar, var Gaup ein dyktig historieforteljar på kurset, og fortalde i tillegg om ulike typar joik. Muriel sjølv var svært nøgd etterpå, og ikkje minst inspirert til å halde fram med draumen sin og øve på joikinga.

Ellen Merete Lyssand

Anne Solberg Andersson

MOT-koordinatorar

MOT Os