Dette Fusa-paret synest det var ekstra vanskeleg å bestemma seg i årets val

Mange ukjende namn på lista baud på utfordringar for Oddvar Opheim og Eva Valestrand Opheim.

Klokka er litt over ti då ekteparet frå Eikhovda ankjem vallokalet i Eikelandsfjorden samfunnshus.

– Var det vanskeleg å bestemma seg?

– Ja, i år var det faktisk det, seier Eva.

Dei mange ukjende Os-namna på lista har gjort det vanskelegare å orientera seg.

Men dei har kryssa av på dei kandidatane dei har ekstra tru på.

– Du veit, kommunevalet er jo eit personval, seier Oddvar.

– Stemmer de likt eller held de valet hemmeleg for kvarandre?

– Nei, når du har vore gift i 49 år så er det ingenting som er hemmeleg legner, ler Oddvar.

Eva fortel at dei har diskutert ein del i forkant, men til slutt landa på det same partiet.

– Kva tenkjer de om samanslåinga med Os?

– Vi er spente. Og litt redde for å verta for små i forhold til Os.

Elektronisk manntal

Leiar for røystestyret, Line Ragnhildstveit, er funksjonær for femte gong. Og for siste gong i eit val der Fusa er eigen kommune.

– Det er jo litt spesielt. Og oppkøyringa i forkant har vore litt annleis enn tidlegare, fortel ho.

Nytt av året er elektronisk manntal, noko ein for lengst har teke i bruk i Os.

Og når vallokala stengjer kl. 21, skal røystene fyrst grovteljast i Eikelandsosen, før dei vert køyrde til Os for finteljing og scanning.

– Blir det pansra bil, då eller?

– Nei, vi satsar på at det går bra utan, ler ho.

anne-marie@osogfusa.no