Skulestruktur for framtida
Det er ikkje alltid «A4-modellen» gjev beste resultata, gjerne er det nettopp det alternative som er løysinga.
Administrasjonen i Vestland fylkeskommune har arbeidd fram eit høyringsutkast til ny skulestruktur for vidaregåande skular frå 2025. Det er truleg naudsynt sidan tal elevplassar er større enn elevtalet i fylket.
Det første prinsippet som ligg til grunn for planutkastet er : «..vidareføra den desentraliserte skulestrukturen. I distrikta er skulen ein viktig hjørnestein for lokalsamfunna og sikrar mange elevar moglegheit til å gå på ein skule nær der dei bur. Elevane skal ha tilgang på variert opplærings- og linjetilbod i sine nærområde.»
Artikkelen held fram under annonsen.
Då forundrar det Bjørnafjorden SV at administrasjonen føreslår å leggja ned eit at dei mest søkte og populære tilboda i Bjørnafjordsregionen.
Det som på folkemunne kallast TAF (TAF/YSK), har sidan oppstarten i 2001 med éin klasse i tekniske fag, vidareutvikla seg til eit svært viktig og populært tilbod, no også i marine fag, helsefag og restaurantfag.
TAF/YSK-modellen fører elevane i løpet av fire år, fram til både studiekompetanse og fagbrev. Under utdanninga kombinerer dei arbeid i bedrift med å gå på skule. Tekniske og allmenne fag (TAF) er eit samarbeid mellom Fusa vidaregåande skule og lærebedrifter innan ulike fagområde.
Etter fire år oppnår dei altså dobbel kvalifikasjon; både fagbrev og studiekompetanse, med fordjuping i realfaga matematikk, fysikk og/eller kjemi.
Dei er formelt elevar ved skulen dei to første åra og deretter lærlingar i bedrift dei to siste, men dei har heile dagar i skule/bedrift alle fire åra. Utdanninga er først og fremst retta mot dei som ønskjer å studera på høgskule- eller universitetsnivå.
Dette utdanningstilbodet har vist seg å vera ein viktig garantist for rekruttering til viktige hjørnesteinsbedrifter i regionen vår. Utdanninga gjev godt kvalifisert arbeidskraft med lokal forankring.
På TAF/YSK lærer elevane å samarbeida og å arbeida sjølvstendig etter eigne planar.
Det same gjeld også på eit anna tilbod høyringsutkastet vil fjerna. KDA (kunst, design og arkitektur) er ei ypparleg 3-årig utdanning som fokuserer på kreative prosessar og utøvande arbeid. Slik kompetanse i problemløysing treng samfunnet for å møta framtida sine utfordringar.
Artikkelen held fram under annonsen.
Bjørnafjordsregionen treng alternative tilbod til den tradisjonelle 3-årige teoretiske vegen til studiekompetanse. Det er ikkje alltid «A4-modellen» gjev beste resultata, gjerne er det nettopp det alternative som er løysinga.
Me hugsar prinsippet i innleiinga: «.. Elevane skal ha tilgang på variert opplærings- og linjetilbod».
Bjørnafjorden SV støttar kravet om å oppretthalda desse tilboda ved Fusa vidaregåande skule ved at skulen får vidareføra kombinasjonsløysingane dei har utvikla.
Hege Bjørnør
Mette Holmefjord Olsen
Bjørnafjorden SV