Skyss i pressemelding fredag: - Vi styrkar busstilbodet frå Os
Skyss tek grep.
Trafikken på den nye linje 600 er høgare enn prognosane Skyss hadde på førehand. No har selskapet bestemt seg for å ta grep.
Frå 6. mars 2023 vert det dobbelt så mange avgangar på linje 600 i rushtid.
Artikkelen held fram under annonsen.
– Det er veldig gledeleg at så mange vil reisa kollektivt, seier Skyss-direktør Målfrid Vik Sønstabø i ei pressemelding fredag.
– Samstundes har det gjort at nokre avgangar ofte vert fulle. Me vil difor dobla frekvensen ein time i rushtida, både om morgonen og om ettermiddagen.
Auka kjem frå 6. mars neste år.
– Me skulle gjerne ha innført ho endå tidlegare, men treng rett og slett litt tid på å få på plass ein god logistikk, med tanke på både bussar og sjåførar, seier Skyss-direktøren vidare.
600-bussen går frå Osøyro til Lagunen langs nye E39, og deretter vidare til Bergen busstasjon. Når den no skal gå kvart 7,5 minutt i rushtid, inneber det ei styrking av tilbodet også for passasjerar i Bergen, påpeikar Skyss.
– Eit godt kollektivtilbod er viktig for å redusera personbiltrafikken i byen. Me håper denne endringa kan bidra til at det vert enklare for endå fleire å velja å reisa kollektivt, seier Sønstabø.
Til Gjermundshamn
I samband med omleggingane ved opninga av den nye vegen til Os, vart det også gjort endringar på linje 740.
Linja fekk fleire avgangar på strekninga Eikelandsosen-Osøyro, med byte til linje 600 på Osøyro terminal. Sjølv om dette har gitt fleire reisemoglegheiter, har det medført nokre utfordringar for reisande til og frå Gjermundshamn og Kvinnherad.
Artikkelen held fram under annonsen.
– For å bøta på dette, vert det frå 6. mars lagt til éin avgang frå Gjermundshamn kl. 10.50 og direkte til både Haukeland sjukehus og Bergen busstasjon. Det vil også vera ein direkteavgang frå Bergen til Gjermundshamn om ettermiddagen, utan overgang på Osøyro, opplyser Skyss fredag.
