Tok våpen frå hissig, rusa mann

Politiet rykte ut til ei adresse i området Nore Neset søndag morgon.

På adressa skal politiet ha funne ein mann i 30-åra. Vedkomande skal ha vore rusa, og han skal ha vore hissig.

— Grunna oppførselen, blei det valt å ta beslag i eit våpen som mannen hadde. Han blei framstilt for legevakt og oppdraget blei gitt vidare til helse, opplyser politioverbetjent ved Bjørnafjorden politistasjon, Anne Lyssand.

Søndag morgon i 08.30-tida gjennomførte Utrykkingspolitiet og patruljen frå Os ein promillekontroll på Halhjem ferjekai. Der skal 40 sjåførar ha blitt kontrollerte. Ingen reaksjonar, opplyser Lyssand i ein e-post.

Stoppa på Halhjemsvegen

Natt til søndag rett før klokka 01.30, kontrollerte politiet eit køyretøy på Halhjemsvegen. Føraren, ein mann i 30-åra, skal ha vore ute på øvingskøyring.

— Han hadde mista lappen for ruskøyring, og tapstida gjekk ut i 2019. Passasjer og eigar av bilen, hadde gyldig førarkort. Begge blåste til 0,0. Føraren fekk ikkje køyra vidare då det mangla “L” på bilen. Eigaren tok difor over køyringa, opplyser Lyssand.