Verdig markering av ein dag mange hugsar som om det var i går
Klokka 12 ringte kyrkjeklokkene over heile landet for ofra i regjeringskvartalet og på Utøya.
Også i Bjørnafjorden stod tida stille mellom 12 og fem over 12 torsdag 22. juli. Då kima det frå Os, på Fusa og i Strandvik.
For dei som hadde møtt fram i Minneparken på Osøyro, vart tida for markeringa ekstra spesiell. Ordførar Trine Lindborg las Frode Grytten sitt nye 22. juli-dikt «Desse minna har ikkje tid til å vente», før dottera hennar, Amalie, la ned blomar på minnesmerket.
Artikkelen held fram under annonsen.
La ned solsikke til minne om niesa
For Ingrid Netland er dagen ekstra tøff. Ho mista niesa si, Åsta Sofie Helland Dahl (16), på Utøya. Med seg til minnemarkeringa hadde Netland ei solsikke.
– Det er Åsta sin blom. Ho elska solsikker. Folk kalla henne berre for klemmen, fortel Netland om niesa.
For Netland er 22. juli tungt kvart år. Men det er spesielt tungt i år.
– Vi må ta eit oppgjer med hatet. Det går ikkje så fort framover, seier ho og takkar ordføraren for markeringa.
– Det betyr mykje for oss som er direkte råka, seier Netland.
Bilete 1 av 2
Sterkt: Det vart ekstra sterkt då Ingrid Netland la ned ei solsikke til minne om niesa si, Åsta Sofie Helland Dahl.Bilete 2 av 2
Sterkt: Det vart ekstra sterkt då Ingrid Netland la ned ei solsikke til minne om niesa si, Åsta Sofie Helland Dahl.Tankefull og stolt
– Ti år er ikkje lang tid når ein saknar nokon, seier Lindborg.
Også ho synest årets markering er ekstra tøff.
– Det er alltid ein vanskeleg dag, men i år er det så mange som har stått fram med historiene sine. Folk eg har vorte kjent med i ettertid av terrorhandlingane. Nokre har vore opne om det dei har vore gjennom, andre har ikkje sagt så mykje, seier ordføraren.
Artikkelen held fram under annonsen.
Lindborg meldte seg inn i Arbeidarpartiet som ein direkte konsekvens av åtaket.
– Eg har alltid vore sosialdemokrat. Men i dagane etter 22. juli, sat eg lamslått framføre TV-en, slik som veldig mange andre. Eg lurte på kva eg kunne bidra med, og bestemte meg for å melda meg inn.
– Når ein høyrer dei sterke historiene, frå folk som er på same alder som borna mine, vert ein tankefull og stolt. Stolt over at dei vågar, og over at dei har klart å reisa seg. Samstundes er det opplevingar som både dei, og familiane deira, kjem til å bera med seg for alltid, påpeikar Lindborg.
Etter markeringa i Minneparken, var kyrkja open fram til klokka 13. I Bergen, Oslo og elles i landet har det vore markeringar i heile dag. I Bergen vert det halde ein minnekonsert klokka 19 med mellom andre Vilde Tuv, Fredrik Saroea med kvartett fra BIT20 Ensemble, 9 grader nord og Frode Grytten. Konserten kan sjåast på Bergen kommune sine nettsider. Den nasjonale minnemarkeringa som startar i Oslo spektrum klokka 19.55 kan ein mellom anna sjå her, på regjeringa si nettside.
