Politiet ferska ein mann som gjorde to lovbrot på ein gong

Det blei ein kostbar køyretur på Osøyro for mannen i 30-åra.

Laurdag ettermiddag klokka 14.37 skal mannen ha køyrd mot innkøyringsforbod-skiltet i sentrum. Samstundes snakka han i mobiltelefonen.

– Han fekk eit førelegg på kroner 6.350. Det er 5.500 kroner for å bryta innkøyringsforbodet. Eigentleg er det 1.700 kroner for å prata i mobiltelefon bak rattet, men det er «halv pris» på den lågaste summen når vi gjev ut to førelegg på ein gong, fortel vakthavande ved Bjørnafjorden lensmannskontor.

Klokka 00.52 søndag blei ein bilist stoppa av politiet. Mannen, som er i starten av 20-åra, køyrde utan gyldig førarkort.

– Patruljen mistenkte også at han var påverka av rus. Dette fordi ein observerer teikn som tilseier at vedkomande er rusa. Han blei teken med til legevakta for blodprøvetaking, fortel vakthavande.