Nytt vassleidningsbrot. Har jobba med å suga opp vatn frå restaurant

Har fått stengd vatnet til leidninga der brotet er.

Kommunen opplyser fredag morgon om eit nytt vassleidningsbrot i Os sentrum.

– Vi har eit vassleidningsbrot i Os sentrum, og har stengd av vatnet. Vi jobbar med utbetring. Når vatnet kjem attende, kan det vera misfarga. Tapp då med kaldt til det er klart, skriv kommunen på sine heimesider.

110 Vest opplyser at brannvesen og politi har vore på plass ved pizzarestauranten Lucianos i sentrum, like nedanfor Stegen. Dei kom til staden like over kl 5.

Utrykkingsleiar i brannvesenet, Tobias Simon Kristensen opplyste til Os & Fusaposten like over kl 7 at dei hadde fått stengd vatnet til leidningen som lek.

Det har vore store mengder vatnet i vegbanen på eit tidspunkt og også inne på Lucianos hadde vatnet trengt inn.

– Heile restauranten er berørt. Me held på med skadeavgrensande tiltak i lokalet, og me jobbar med å suga opp vatnet frå lokala, fortalde Kristensen fredag morgon.

Dei skal på eit tidspunkt ha måtta stengja vegen på grunn av vatnet.

– Vegen var stengd i eitt felt, men etter ei stund gjekk trafikken som vanleg att. Me har fått god hjelp av saltebil som har salta godt i området, etter at vatnet som lek ut, fraus til is. Vasslekkasje og minus 13 grader er ei utfordring, konstaterer utrykkingsleiar.

Bergen Vann har også vore på staden og jobbar med utbetring av skaden på vassleidningen.

Dette er eitt av fleire vassleidningsbrot i sentrum den siste tida.