Skal du ha taxi etter at rakettane går i lufta, må du ha litt tolmod
Os Taxi stiller med fullt mannskap på nyttårsaftan, men bed folk smørja seg med tolmod etter midnatt.
— Fram til klokka 24 er det mogleg å førehandsbestilla taxi, men etter det, må me berre ta oppdraga etter kvart som dei kjem, slår Tor Anders Hauge i Os Taxi fast.
Han er klar på at det ikkje løner seg å skulla henta passasjerar til faste tidspunkt på nattestid på nyttårsaftan.
Artikkelen held fram under annonsen.
— Me har opplevd fleire gonger at det ikkje går. Då kjem me kanskje til avtalt tid klokka 02.00 berre for å oppleva at kundane ikkje vil heim nett då likevel, og så har me det gåande. Nei, ein slik kveld må folk heller bestilla, tola å venta litt og ta taxien når han kjem, slår Hauge fast.
Litt sjukdom
Også i Os Taxi har det vore ein del sjukdom denne jula. Hauge håpar alle sjåførar er disponible på nyttårsaftan.
— Me bruker å køyra fullt mannskap på slike kveldar. Alle sjåførar og alle bilar skal vera i drift. Om alle er friske, har me i alle høve 16 bilar ute.
— Har du eit tips til folk som ikkje får taxi akkurat når dei ønskjer?
— Ver tolmodig. Så lenge det er oppdrag, vil me køyra, så det er berre å venta. Om naudsynt, køyrer sjåførane våre til godt ut på morgonkvisten og vel så det, seier Hauge.