21 nye smittetilfelle sist veke. Éin skuleklasse har fått oppmoding om å testa seg
Det blei registrert 21 nye smitta i Bjørnafjorden kommune i veka som gjekk.
Det opplyser kommunen måndag ettermiddag.
– Ingen av dei smitta er alvorleg sjuke, seier kommuneoverlege Klaus Melf til kommunen sine heimesider.
Artikkelen held fram under annonsen.
Dei 21 tilfella er:
* Fem barneskuleelevar. To har vore på skulen i smittsam fase. Éin klasse har fått oppfølging med oppmoding om å testa seg.
* Seks ungdomsskuleelevar: Fire smitta ved éin skule, éin ved ein annan i Bjørnafjorden og éin elev ved ein ungdomsskule i ein annan kommune. Alle dei tre berørte skulane og klassane er varsla.
* Elev ved vidaregåande skule i Bergen.
* Ni vaksne med kjend smitteveg. Éin er smitta i utlandet, åtte i husstanden. Fem av dei ni er fullvaksinerte.
176 testar
Kommunen opplyser at det vart teke 176 testar på teststasjonane sist veke.
Kommuneoverlegen melder at det framleis er utfordrande å nå målet om 90 prosent vaksinerte i aldersgruppa 18-44 år. Lågast vaksinedekning har personar mellom 25 og 39 år - og spesielt arbeidsinnvandrarar frå Polen og Litauen.
