Leiteaksjon i Fusa: Har fått helikopterstøtte

Det er starta leiteaksjon i Fusa etter ein mann som har vore borte frå bustaden sin sidan kl 03.00 natt til torsdag. 

Politiet leitar i området Eikelandsosen.

— Vi er i området med politihund. Mannskap frå Røde Kors, Norsk Folkehjelp og Norske Redningshunder deltek også, opplyser operasjonsleiar Steinar Hausvik. 

Redningshelikopteret frå Hovudredningssentralen på Sola er på veg. 

Mannen er ca 170 høg, iført svart turbukse, blå strikkegenser og store støvlar.

— Ved observasjon ring 02800 evt 112 ved akutt fare for liv og helse, opplyser politiet.

Mannen er i 20-åra og skal vera tynnkledd.

Oppdatert: 

Innsatsleiar Jarle Sjo Myklebust fortel til Os & Fusaposten at politiet starta leitinga i natt.

— Me byrja med eigne ressursar. Ut frå informasjonen vi sit med no, er det sett i gang ein større leiteaksjon der vi får bistand frå Røde Kors, Norsk Folkehjelp og Norske Redningshunder, og det vert leita både med dronar og båt, då det er fleire aktuelle leitestader i den fasen me er i no, seier Sjo Myklebust.

Politiet har også helikopterstøtte for raskt å kunna sjå over større område.

— No er vi i ein startfase og har godt med ressursar, der vi jobbar i to spor; med etterretning og leiting. Det vil etter planen også koma meir mannskap, seier Sjo Myklebust som seier dei gjerne vil ha tips i saka.