Os & Fusaposten inviterer til folkemøte i Eikelandsosen

22. oktober inviterer Os & Fusaposten til folkemøte i Eikelandsfjorden samfunnshus.

Programleiar og journalist Anne Marie Aarøen Vangsnes er godt i gang med førebuingane til folkemøtet. I desse dagar ringjer ho rundt for å sondera terrenget og ta pulsen på folk, politikarar og næringsliv. 

— Eg er nysgjerrig på å høyre kva folk tenkjer og synest. Ikkje minst når dei slepp å bli sitert på det i avisa. Er frontane så steile som ein kan få inntrykk av i kommentarfelta, spør Vangsnes.

Kommunedirektør Arild McClellan Steine og ordførar Terje Søviknes deltek. Vi får også ein panelsamtale med dei noverande og tidlegare kommunestyrerepresentantane Richard Markhus (Ap), Bjarte Samnøy (KrF), Hege Aase Tysnes (Sp) og Hans Vindenes (H).

Aksjonsgruppa Fusabrølet er representert ved Mette Holmefjord Olsen. 

Det blir også intervju med eit par næringslivsleiarar og "heilt vanlege folk". Til slutt i møtet vert det høve til å stilla spørsmål. 

Os & Fusaposten håpar mange har lyst og moglegheit til å bidra i samtalen, og prøver å invitera 'breitt' - både politikarar, administrasjon, ekspertar, tilsette, mannen i gata - for å få fram flest mogleg perspektiv.

Møtet tek til kl 18. 

— For å sikra at det, i alle fall innimellom, blir god stemning, har vi førebudd nokre innslag som garantert vil få opp humøret, seier Vangsnes.

I forkant av folkemøtet håpar avisa at også du som lesar vil engasjera deg. 

Har du eit spørsmål om kommunesamanslåinga, stoda i Fusa etter samanslåinga eller tankar om kva som kan styrka samhaldet i kommunen, send ein epost til post@osogfusa. 

Kanskje er det akkurat ditt spørsmål vi stiller i folkemøtet 22. oktober?

Hjarteleg velkomen!

Ps: Har du ikkje høve til å delta på folkemøtet, fortvil ikkje. Folkemøtet vert filma, og send på osogfusa.no i etterkant.